व्हिडीओ व्हायरल…सावकाराकडून शेतकऱ्याला ट्रॅक्टरच्या चाकाखाली चिरडण्याचा प्रयत्न !
जळगाव टुडे । शेतीचा ताबा घेण्याच्या वादातून सावकार आणि त्याच्या सोबतच्या काही गुंडांनी शेतकऱ्याला ट्रॅक्टरच्या चाकाखाली चिरडण्याचा प्रयत्न केल्याचा खळबळजनक प्रकार एका व्हिडीओमुळे उघडकीस आला आहे. सदरचा व्हिडीओ (Viral Video) सध्या सोशल मीडियावर चांगलाच व्हायरल देखील झालेला आहे. दरम्यान, संबंधित सावकाराच्या विरोधात सगळीकडे संतापाची लाट उसळली आहे. पोलिसात सावकार आणि त्याच्या गुंडांच्या विरोधात गुन्हा देखील दाखल झाला आहे.
सावकाराकडून शेतकऱ्याला जीवे ठार मारण्याचा प्रयत्न झाल्याची धक्कादायक घटना अकोला जिल्ह्यात मनब्दा (ता.तेल्हारा) गावात घडली आहे. सदर घटनेचा व्हिडिओ सध्या सोशल मीडियावर व्हायरल झाला असून, त्यातून सावकाराच्या जाचाचा पर्दाफाश झालेला आहे. प्राप्त माहितीनुसार, मनब्दा गावातील संदीप गतमने कुटुंबीय आणि सावकार मंगेश शेळके आणि नीलेश शेळके यांच्यात शेतीच्या ताब्यावरुन बऱ्याच दिवसांपासून वाद सुरू झाला. सदर वाद सध्या न्यायालय प्रविष्ठ असताना सावकार शेळके यांनी गतमने यांच्या शेतीचा ताबा घेण्याचा प्रयत्न केला. त्यांच्या त्या प्रयत्नाला विरोध करणाऱ्या गतमने कुटुंबीयांवर सावकार शेळके आणि त्यांच्या गुंडांनी जोरदार हल्ला चढवला. संदीप गतमने यांना ट्रॅक्टरच्या चाकाखाली चिरडण्याचा प्रयत्न करून त्यांच्या वडिलांवर पाठीवर धारदार शस्त्राने वार करण्यात आले आहेत.
दरम्यान, सावकाराकडून घेतलेले सर्व कर्ज व्याजासकट परत केल्यानंतर देखील शेळके सावकार हा संदीप गतमने यांच्या कुटुंबाला त्रास देत होता. शेती ताब्यात घेण्यासाठी पुढे आलेला सावकार शेवटी शेतकरी गतमने कुटुंबाच्या जीवावरच उठला. याप्रकरणी तेल्हारा पोलिस ठाण्यात सावकार आणि त्याच्या तीन सहकाऱ्यांवर गुन्हे दाखल करण्यात आले आहेत. पोलिसांच्या पुढील कारवाईकडे आता सर्वांचे लक्ष लागले आहे.
