भाजपचे उमेदवार ॲड. उज्ज्वल निकम यांच्याकडे आहे ‘इतक्या’ कोटी रूपयांची संपत्ती : Ujjwal Nikam
Jalgaon Today : उत्तर-मध्य मुंबई मतदारसंघातील लोकसभेचे उमेदवार ॲड. उज्ज्वल निकम (Ujjwal Nikam) यांनी महायुतीकडून शुक्रवारी आपला उमेदवारी अर्ज दाखल केला. दरम्यान, नामनिर्देशन अर्ज दाखल करताना ॲड. निकम यांनी त्यांच्या स्थावर व जंगम मालमत्तेसह वाहनांची माहिती प्रतिज्ञापत्रात सादर केली आहे. त्यानुसार त्यांच्याकडे सध्याच्या घडीला सुमारे 28 कोटी रूपयांची संपत्ती असल्याचे दिसून आले आहे. त्यांच्या मालकीची जळगावसह नाशिक, अंधेरी आणि दहीसर येथे घरे देखील आहेत.
राज्याचे विशेष सरकारी वकील म्हणून प्रदीर्घ काळ कार्यरत असणारे ॲड. उज्ज्वल निकम यांचे वकीली व्यवसायात बरेच मोठे नाव आहे. ते जळगाव जिल्ह्यातील चोपडा तालुक्याचे मूळ रहिवासी असले तरी त्यांची कर्मभूमी प्रामुख्याने मुंबई राहिली आहे. आजपर्यंतच्या वाटचालीत मोठमोठे खटले लढवून गुन्हेगारी प्रवृत्तीच्या छातीत धडकी भरवण्याचे काम त्यांनी केले. आता ते राजकीय क्षेत्रात पदार्पण करून विरोधी पक्षांना घाम फोडण्यासाठी सज्ज झाले आहेत.
शुक्रवारी (ता.03) त्यांनी वांद्रे येथील उपजिल्हाधिकारी कार्यालयात वाजतगाजत उमेदवारी अर्ज दाखल करून सर्वांचेच लक्ष वेधून घेतले. यावेळी राज्याचे उपमुख्यमंत्री देवेंद्र फडणवीस तसेच आमदार आशिष शेलार यांच्या उपस्थितीत महायुतीच्या कार्यकर्त्यांनी रॅली सुद्धा काढली होती. उमेदवारी अर्ज दाखल करताना सादर केलेल्या प्रतिज्ञापत्रात ॲड.उज्ज्वल निकम यांनी त्यांच्याकडे स्थावर आणि जंगम मालमत्ता मिळून एकूण सुमारे 27 कोटी 70 लाख 71 हजार 983 रूपयांची संपत्ती असल्याचे म्हटले आहे.
अशी आहे स्थावर व जंगम मालमत्ता
ॲड. उज्ज्वल निकम यांच्याकडे 11 लाख 35 हजार 795 रूपयांची रोख रक्कम तसेच 05 लाख 27 हजार 433 रूपयांची हुंदाई कार, 14 लाख 71 हजार 640 रूपये किंमतीचे सोने, 02 लाख 59 हजार 500 रूपये किंमतीची चांदी, अशी एकूण 17 कोटी 45 लाख 95 हजार रूपयांची जंगम मालमत्ता आहे. याशिवाय त्यांची नाशिकच्या पाथर्डीमध्ये 93 लाख रूपये किंमतीची 0.49 एकर आणि मंगरूळमध्ये 05 लाख 64 हजार रूपये किंमतीची 1.44 एकर शेतजमिन आहे. याव्यतिरिक्त नाशिकमध्ये त्यांची तीन ठिकाणी साडेपाच कोटी रूपये किंमतीची बिनशेती जमिन आहे. जळगाव, अंधेरी आणि दहिसरमध्ये 10 कोटी 24 लाख 76 हजार 978 रूपये किंमतीची घरे आहेत. त्याचप्रमाणे त्यांच्या पत्नीच्या नावे मुंबईतील माहिममध्ये 08 कोटी 46 लाख 11 हजार 910 रूपये किंमतीची मालमत्ता आहे.
