जळगावच्या शिवतीर्थ मैदानावर उद्या मंगळवारी उद्धव ठाकरे यांची जाहीर सभा

Jalgaon Today : जळगाव लोकसभा मतदारसंघातील महाविकास आघाडीचे उमेदवार करण बाळासाहेब पाटील-पवार यांच्या प्रचारार्थ शिवसेना उबाठाचे पक्ष प्रमुख उद्धव ठाकरे (Uddhav Thackeray) यांची जाहीर सभा मंगळवारी (ता.07) आयोजित केली आहे. सायंकाळी पाच वाजता शहरातील शिवतीर्थ मैदानावर सदरची सभा होणार आहे.

जळगाव लोकसभा मतदारसंघात महायुतीच्या उमेदवार श्रीमती स्मिता वाघ यांच्या विरोधात महाविकास आघाडीचे उमेदवार करण पाटील उभे ठाकले आहेत. दरम्यान, दोन्ही उमेदवारांसाठी त्या-त्या पक्षांनी अद्याप कोणत्याच स्टार प्रचारकांच्या सभा जळगाव मतदारसंघात आयोजित केलेल्या नव्हत्या. त्यामुळे प्रचार आघाड्यांवर काही प्रमाणात निरूत्साहाचे वातावरण देखील दिसून येत होते. मात्र, मंगळवारी जळगावमध्ये थेट पक्ष प्रमुखांची सभा ठेवून शिवसेना ठाकरे गटाने त्याबाबतीत मोठी आघाडी घेतली आहे. शिवतीर्थ मैदानावरील सभेसाठी आवश्यक ती जय्यत तयारी देखील करण्यात आली आहे. सभेच्या निमित्ताने जोरदार शक्तिप्रदर्शनाचे नियोजन महाविकास आघाडीतर्फे करण्यात आले आहे. या सभेत उद्धव ठाकरे महायुतीच्या नेत्यांविरोधात काय बोलतात, त्याकडे सर्वांचे लक्ष लागले आहे.