Jayant Patil : लाडकी बहीण योजनेसाठी राज्यातील आदिवासी व मागासवर्गीयांच्या कल्याण निधीवर कुऱ्हाड !

Jayant Patil : विधानसभेची निवडणूक डोळ्यासमोर ठेवून राज्य सरकारने जाहीर केलेली लाडकी बहीण योजना अर्थ खात्याने निधी देण्यास नकार दिल्याने चांगलीच अडचणीत सापडली आहे. वित्त विभागाचा विरोध डावलून अर्थसंकल्पात इतरही काही योजना घातल्या आहेत. त्यासाठी आता आदिवासी व मागासवर्गीयांच्या कल्याणासाठी असलेला निधी वळविण्याचे काम सध्या सुरू आहे, असा मोठा गौप्यस्फोट शरदचंद्र पवार राष्ट्रवादी काँग्रेसचे प्रदेशाध्यक्ष जयंत पाटील यांनी केला आहे. त्यामुळे मोठी खळबळ सुद्धा उडाली आहे.

Jayant Patil: Ax on development fund of tribals and backward classes for Ladaki Bahin Yojana!
राष्ट्रवादी काँग्रेसचे नेते जयंत पाटील यांनी सत्ताधारी सरकारवर तीव्र टीका करत एक दावा केला आहे की, “हे सरकार फार मर्यादित दिवसांसाठी काम करायचे अशा पद्धतीने काम करते आहे. अजून 40 दिवस त्यांच्या हातात आहे. त्यामुळे अजूनही काही घोषणा होण्याची शक्यता आहे.” जयंत पाटील यांच्या या वक्तव्यामुळे राजकीय वर्तुळात चांगलीच खळबळ उडाली आहे. त्यांच्या म्हणण्याचा रोख हा सत्ताधारी पक्षाच्या अल्पकालीन धोरणांवर आणि अस्थिरतेवर आहे. पाटील यांचे मत आहे की, सरकारने अल्पकालीन उपाययोजना आणि घोषणा करून केवळ आपली सत्ता टिकवण्याचा प्रयत्न केला आहे, परंतु दीर्घकालीन विकासाची दिशा अद्याप स्पष्ट नाही.

‘लाडकी बहीण’ योजना जाहीर न करण्याचा सरकारला मिळाला होता सल्ला
जयंत पाटील म्हणाले, की “माझ्या माहितीप्रमाणे वित्त विभागाने सरकारला स्पष्टपणे सांगितले होते की, ‘लाडकी बहीण’ योजना जाहीर करू नका. अंमलबजावणी शक्य नाही. तरीही सरकारने वित्त विभागाचा विरोध न जुमानता ही योजना आणि इतर काही योजना अर्थसंकल्पात समाविष्ट केल्या.” दरम्यान, वित्त विभागाच्या सल्ल्याचा सरकारने अव्हेर केला असल्याने योजनेची अंमलबजावणी कशी केली जाईल, याबाबत शंका उपस्थित होत आहेत. या परिस्थितीमुळे राज्यातील आर्थिक स्थितीवर आणि आगामी योजनांवर काय परिणाम होईल, याकडे सर्वांचे लक्ष लागले आहे. जयंत पाटील यांच्या वक्तव्यामुळे आगामी काळात राजकीय वातावरण तापण्याची शक्यता आहे. त्यांनी केलेल्या आरोपांवर सत्ताधारी पक्ष कसा उत्तर देतो याकडे सर्वांचे लक्ष लागले आहे.