वैर दोघांमधले संपतच नाही…मंत्री महाजनांचे एकनाथ खडसेंबद्दल खळबळजनक वक्तव्य | Jalgaon News
Jalgaon Today : आमदार एकनाथ खडसे यांनी काही दिवसांपूर्वी भाजपमध्ये घरवापसी करण्याचा निर्णय घेतलेला असला तरी त्यांचा अजून भाजपमध्ये प्रवेश झालेला नाही. त्यातच एकनाथ खडसे यांनी सुनबाई रक्षा खडसे यांचा रावेर लोकसभा मतदारसंघात प्रचार सुरू केला आहे. या कारणावरुन मंत्री गिरीश महाजन यांनी एकनाथ खडसेंवर पुन्हा निशाणा साधला असून, त्यांना संधीसाधू संबोधून खळबळ उडवून दिली आहे. (Jalgaon News)
मुक्ताईनगरच्या विधानसभा निवडणुकीत मुलगी तुतारी घेऊन उमेदवारी करण्याच्या तयारीत आहे. खडसे यांची भूमिका संधीसाधूपणाची आहे. घरात सगळेच पक्ष ठेवायचे, असे त्यांचे काम सुरु आहे. त्यांनी आमदारकी आणि खासदारकीसाठी सगळ्यांनी काम करायचे. लोकांना असे राजकारण आवडत नाही. त्यामुळे त्यांनी एक भूमिका घेतली पाहिजे, असा हल्लाबोल मंत्री गिरीश महाजन यांनी एकनाथ खडसे यांच्यावर केला आहे.
याशिवाय एकनाथ खडसे हे राष्ट्रवादी शरद पवार गटाचे आमदार आहेत. खडसे यांनी अगोदर आमदारकीचा राजीनामा द्यावा, त्यानंतर त्यांनी भाजपचे काम करावे. लोकांमध्ये गैरसमज निर्माण होत आहेच. ते कधी म्हणतात मी राष्ट्रवादीचा तर कधी म्हणतात मी भाजपचा आहे. हे नेमकं काय चालू आहे, असे म्हणत मंत्री गिरीश महाजन यांनी एकनाथ खडसेंवर जोरदार टीका केली आहे. त्यामुळे दोघांमधील राजकीय वैर संपण्याची कोणतीही सध्यातरी कोणतीच चिन्हे नाहीत.
