जळगाव शहरात 23 फेब्रुवारीपासून महसूल विभागाच्या क्रीडा व सांस्कृतिक स्पर्धा

Jalgaon News : नाशिक महसूल विभागातील पाच जिल्ह्यांच्या महसूल अधिकारी, कर्मचारी यांच्या क्रीडा व सांस्कृतिक स्पर्धा शुक्रवार (ता. 23 फेब्रुवारी) पासून जळगावच्या छत्रपती शिवाजी महाराज जिल्हा क्रीडा संकुलात होणार आहेत. या स्पर्धांचे उदघाटन राज्याचे महसूल मंत्री राधाकृष्ण विखे पाटील यांच्या हस्ते सकाळी नऊ वाजता होईल.

यावेळी राज्याचे ग्रामविकास मंत्री गिरीश महाजन, पाणी पुरवठा व स्वच्छता मंत्री तथा पालकमंत्री गुलाबराव पाटील, राज्याचे मदत व पुनर्वसन मंत्री अनिल पाटील, खा. श्रीमती रक्षा खडसे, खा. उन्मेष पाटील, आ. एकनाथ खडसे, आ. किशोर दराडे, आ. सत्यजित तांबे, आ. चिमणराव पाटील, आ. संजय सावकारे, आ. शिरीष चौधरी, आ. सुरेश भोळे, आ. किशोर पाटील, आ. मंगेश चव्हाण तसेच महसूल विभागाचे अपर मुख्य सचिव राजगोपाल देवरा उपस्थितीत राहणार आहेत.

महसूल स्पर्धा ता. 23, 24, 25 फेब्रुवारी तीन दिवस असतील. या स्पर्धेचे यजमानपद जळगाव जिल्ह्याला लाभले असून यासाठी पाच जिल्ह्यातून पाच संघ आणि एक आयुक्त कार्यालय, असे एकूण सहा संघ असणार आहेत. यात एकूण 14 क्रीडा प्रकार खेळले जाणार असून, त्यात सांघिक सामने 48, वैयक्तिक सामने 208 असे एकूण 256 सामने खेळले जाणार आहेत. या स्पर्धेत पुरुष खेळाडू 607 तर महिला खेळाडू 177 असे एकूण 784 खेळाडू सहभागी आहेत. यात सांस्कृतिक स्पर्धाही होणार असून त्यात गायन, वादन, अभिनय, नृत्य, निवेदन, समुहगान, नाटीका आदिचा समावेश आहे. वैयक्तिक स्पर्धेमध्ये पहिले, दुसरे, तिसरे पारितोषिक असणार आहे. तर सांघिक स्पर्धेत विजेता आणि उपविजेता निवडला जाणार आहे.

रविवारी स्पर्धेच्या विजेत्यांना बक्षीस वितरण
स्पर्धेचा बक्षीस समारंभ रविवार (ता. 25 फेब्रुवारी) रोजी राज्याचे ग्रामविकास मंत्री गिरीश महाजन, पाणी पुरवठा व स्वच्छता मंत्री तथा पालकमंत्री गुलाबराव पाटील, मदत व पुनर्वसन मंत्री अनिल पाटील यांच्या शुभहस्ते होणार आहे. नाशिक विभागाचे आयुक्त राधाकृष्ण गमे, नाशिकचे जिल्हाधिकारी जलज शर्मा, धुळ्याचे जिल्हाधिकारी अभिनव गोयल, नंदुरबारचे जिल्हाधिकारी मनिषा खत्री, अहमदनगरचे जिल्हाधिकारी सिद्धाराम सालीमठ आणि जळगावचे जिल्हाधिकारी आयुष प्रसाद हे या स्पर्धेचे निमंत्रक आहेत.