ग्वाल्हेरच्या 51 व्या वरिष्ठ राष्ट्रीय कॅरम स्पर्धेत जैन इरिगेशनच्या पुरुष संघास राष्ट्रीय विजेतेपद

Jain Irrigation : मध्य प्रदेशातील ग्वाल्हेर येथे सहा ते दहा एप्रिल दरम्यान लक्ष्मीबाई नॅशनल इन्स्टिट्यूट ऑफ फिजिकल एज्युकेशनमध्ये संपन्न झालेल्या 51 व्या वरिष्ठ राष्ट्रीय पुरुष व महिला अजिंक्यपद कॅरम स्पर्धेत जळगाव येथील जैन इरिगेशनच्या पुरुष संघाने अंतिम सामन्यात सिव्हिल सर्व्हिसेस संघावर दोन-एकने विजय प्राप्त करून राष्ट्रीय विजेतेपद पटाकावले. सदर सामन्यात पहिल्या एकेरीच्या सामन्यात जैन इरिगेशनचा संदीप दिवे हा सिव्हिल सर्व्हिसेसच्या अब्दुल रहमान विरुद्ध पराभूत झाला.

एकेरीच्या दुसऱ्या सामन्यात जैन इरिगेशनच्या जैद अहमद फारुकीने सिव्हिल सर्व्हिसेसच्या सोनू चौधरीवर विजय मिळवून संघास एक-एक अशी बरोबरी करून दिली. दुहेरीच्या निर्णायक सामन्यात जैन इरिगेशनच्या योगेश धोंगडे आणि अभिजीत त्रिपणकर यांनी सिव्हिल सर्व्हिसेसच्या प्रफुल्ल मोरे आणि राहुल सोलंकी ह्या जोडीवर सरळ दोन सेटमध्ये विजय प्राप्त करून आपल्या संघास दुसरे राष्ट्रीय विजेतेपद प्राप्त करून दिले. ह्याआधी जैन इरिगेशनच्या पुरुष संघाने सन 2020 मध्ये पुदुचेरी येथे झालेल्या आंतर संस्था राष्ट्रीय कॅरम स्पर्धेत विजेतेपद प्राप्त केले होते. तत्पूर्वी एकूण 26 राज्य आणि 12 संस्थांमधील एकूण 230 खेळाडूंमधील एकेरीच्या लीग स्पर्धेचे निकालाचे आधारावर जैन इरिगेशन संघाची आंतर संस्था सांघिक विजेतेपद गटातील अंतिम चार संघात दुसऱ्या क्रमांकावर निवड झाली. त्यात पहिल्या उपांत सामन्यात सिव्हिल सर्व्हिसेसने रिझर्व बँक ऑफ इंडियावर दोन-एक ने विजय प्राप्त केला. तसेच दुसऱ्या उपांत्य सामन्यात जैन इरिगेशन संघाने सी.ए.जी. (CAG ) संघावर दोन-एकने विजय मिळवून अंतिम फेरीत प्रवेश केला होता. ह्या सामन्यात एकेरीच्या सामन्यांमध्ये जैन इरिगेशनच्या संदीप दिवे आणि जैद अहमद फारुकी यांनी विजय मिळविला होता.

अंतिम सामना संपल्यानंतर लगेच पारितोषिक वितरण करण्यात आले. ह्या प्रसंगी प्रमुख पाहुणे म्हणून लक्ष्मीबाई नॅशनल इन्स्टिट्यूट ऑफ फिजिकल एज्युकेशनच्या कुलपती सौ. इंदू बोरा, आंतरराष्ट्रीय कॅरम फेडरेशनचे अध्यक्ष श्री. जोसेफ मेयर (स्वित्झर्लंड) , महासचिव श्री. व्ही.डी. नारायण, अखिल भारतीय कॅरम महासंघाच्या महासचिव सौ. भारती नारायण व इतर पदाधिकारी तसेच मध्य प्रदेश कॅरम असोसिएशनचे श्री. काशीराम जी, महाराष्ट्र कॅरम असोसिएशनचे श्री. अरुण केदार व इत्यादी पदाधिकारी उपस्थित होते.

सहाव्या विश्व कप कॅरम स्पर्धेकरिता जैन इरिगेशनच्या संदीप दिवे व योगेश धोंगडे यांची निवड

दरम्यान, सदर 51 व्या राष्ट्रीय कॅरम स्पर्धा आणि डिसेंबर 2023 मध्ये विशाखापटणम्म येथे संपन्न झालेल्या 28 व्या राष्ट्रीय फेडरेशन चषक कॅरम स्पर्धेच्या एकेरीच्या सामन्यांमधील कामगिरी आधारे भारतीय संघाच्या आठ सदस्ययी संघात जैन इरिगेशनच्या संदीप दिवे आणि योगेश धोंगडे यांची निवड करण्यात आलेली आहे. सदर खेळाडू दिनांक 10 ते 17 नोव्हेंबर 2024 दरम्यान अमेरिकेतील कॅलिफोर्निया येथे होणाऱ्या सहाव्या विश्व कप कॅरम स्पर्धेकरिता भारतीय संघाचे प्रतिनिधित्व करतील. जैन इरिगेशन संघाच्या सदर यशस्वी कामगिरीबद्दल त्यांचे जैन इरिगेशनचे अध्यक्ष श्री. अशोक जैन, संचालक श्री.अतुल जैन, मुख्य प्रशासकीय क्रीडा अधिकारी श्री. अरविंद देशपांडे तसेच सर्व सहकाऱ्यांनी अभिनंदन केले आहे.

अशोकभाऊ जैन, अतुल जैन यांच्याकडून विजेत्या खेळाडुंचे कौतूक

मागील आठवड्यात आमच्या कॉर्पोरेट क्रिकेट संघाने टाइम्स शिल्ड क्रिकेट स्पर्धेत अजिंक्यपद पटकावले व आता ग्वाल्हेर (मध्य प्रदेश) येथे 51 व्या सिनियर कॅरम स्पर्धेत सिव्हिल सर्व्हिसेस यांच्या संघावर 2-1 अशी मात करताना राष्ट्रीय विजेतेपद पटकावले याचा मनस्वी आनंद होतो आहे,अशी प्रतिक्रिया जैन इरिगेशनचे सिस्टिम्स लि.चे अध्यक्ष श्री अशोकभाऊ जैन यांनी व्यक्त केली. जैन स्पोर्ट्स अकॅडमीचे संचालक अतुल भाऊ जैन यांनी सुद्धा या विजेतेपदाबद्दल आनंद व्यक्त केला व सर्व खेळाडूंचे विशेष कौतुक केले आहे.

फोटो कॅप्शन : विजेतेपदाची ट्रॉफी कुलपती इंदू बोरा यांच्याकडून स्वीकारताना जैन इरिगेशनच्या संघातील खेळाडू डावीकडून सर्वश्री रहीम खान, पंकज पवार (कर्णधार), संदीप दिवे, सय्यद मोहसिन (संघ व्यवस्थापक), योगेश धोंगडे,अभिजीत तिरुपणकर व जैद अहमद फारुकी.