जळगावकरांसाठी गांधीतीर्थाच्या तपपूर्ती निमित्त ‘चला, सूत कताई शिकू या’ उपक्रमाचे आयोजन

रविवारपासून भाऊंच्या उद्यानात उपक्रमाला होत आहे सुरुवात
Gandhi Teertha : जळगाव येथील गांधी रिसर्च फाऊंडेशनच्या गांधीतीर्थ या महात्मा गांधीजींच्या जीवन कार्यावरील पहिल्या जगप्रसिद्ध ऑडिओ-गाईडेड संग्रहालयाच्या तपपूर्ती निमित्त ‘चला, सूत कताई शिकू या’ या आगळ्यावेगळ्या उपक्रमाचे आयोजन करण्यात आले आहे. रविवारी (ता.24) मार्चपासून भाऊंच्या उद्यानात या उपक्रमाला सुरुवात होत असून, 31 मार्चला शहरातील महात्मा गांधी उद्यानात त्याची सांगता होणार आहे.

भारतीय स्वातंत्र्याच्या संग्रामात चरख्याची भूमिका अनन्यसाधारण होती. महात्मा गांधी सूत कताईला यज्ञ म्हणायचे. सूत कताई हे सत्य, अहिंसा, क्रांती व प्रगतीचे प्रतीक असल्याचे ते म्हणत. आधुनिक काळातही चरख्याचे महत्व विविध शास्त्रीय आधारावर सिद्ध झाले आहे. चरखा चालविल्याने मेंदूची बौद्धिक क्षमता, तार्किक क्षमता, एकाग्रता, बहू-कार्यक्षमता, मन-शरीर समन्वय, आत्मजागरुकता वाढीस लागते. तसेच तणावरहीत जीवनशैलीसह मनःशांती लाभून जीवन आनंदी होते. जळगावकरांना त्याचा अनुभव द्यावा, या उद्देशाने संस्थेने सदरचा उपक्रम हाती घेण्यात आला आहे. दि. 24, 26 आणि 27 मार्च रोजी भाऊंच्या उद्यानात तर दि. 29, 30 आणि 31 मार्च रोजी महात्मा गांधी उद्यानात सकाळी व संध्याकाळी साडेसहा ते साडेआठ या वेळेत आयोजित करण्यात आलेल्या या उपक्रमाचा जळगावकरांनी मोठ्या संख्येने सहभागी होऊन लाभ घ्यावा, असे आवाहन प्रसिद्धीपत्रकाद्वारे करण्यात आले आहे. सकाळी व संध्याकाळी साडेसहा ते साडेआठ या वेळात गांधी रिसर्च फाऊंडेशनचे सहकारी इच्छुकांना चरखा चालविण्यास शिकविण्यात येणार आहे.