शेतकऱ्यांना दिवसा वीज देण्यासाठी शासनाकडून 11 हजार 585 कोटींच्या प्रकल्पास मान्यता

Eknath Shinde : मुख्यमंत्री एकनाथ शिंदे यांच्या अध्यक्षतेखाली बुधवारी (ता.13) पार पडलेल्या राज्य मंत्रिमंडळाच्या बैठकीत शेतकऱ्यांना दिवसा वीज देण्यासाठी शासनाकडून 11 हजार 585 कोटी रूपयांच्या प्रकल्पास मान्यता देण्यात आली. राज्यातील पोलिस पाटलांना आता 15 हजार रूपये दरमहा मानधन देण्यात येणार आहे. आशा स्वयंसेविकांच्या मानधनात सुद्धा पाच हजार रुपये वाढ करण्यात आली आहे.

मंत्रिमंडळाच्या बैठकीतील महत्वाचे निर्णय
■ मराठी भाषेच्या प्रचार, प्रसारासाठी अद्ययावत मराठी भाषा धोरण जाहीर (मराठी भाषा विभाग)
■ पोलीस पाटलांच्या मानधनात भरीव वाढ. आता मिळणार महिन्याला 15 हजार (गृह विभाग)
■ अहमदनगर शहराचे नामकरण अहिल्यानगर करण्यास मान्यता (सामान्य प्रशासन विभाग)
■ केंद्राच्या सहाय्याने लहान शहरांमध्ये अग्निशमन सेवा बळकट करणार. राज्याच्या 153 कोटी रूपये हिश्श्याला मान्यता (नगरविकास विभाग)
■ श्रीनगरजवळ महाराष्ट्र राज्य अतिथीगृह बांधणार. अडीच एकर भूखंड घेणार (सार्वजनिक बांधकाम विभाग)
■ कोल्हापूर, सांगली जिल्ह्यामधील पूर नियंत्रणासाठी जागतिक बँकेचे अर्थसहाय्य. 3200 कोटींचा प्रकल्प
(मदत व पुनर्वसन)
■ भांडवली गुंतवणुकीसाठी विशेष सहाय्य योजनेत 50 वर्ष मुदतीचे बिनव्याजी कर्ज (वित्त विभाग)
■ राष्ट्रीय आरोग्य विभागातील कंत्राटी कर्मचाऱ्यांना सेवेत घेणार. हजारो कर्मचाऱ्यांना लाभ (आरोग्य विभाग)
■ महानंद प्रकल्पाची स्थिती सुधारून नफ्यात आणणार (दुग्धविकास विभाग)
■ मंगळवेढा उपसा सिंचन योजनेस मान्यता, 35 गावांना लाभ होणार (जलसंपदा विभाग)
■ मूर्तिजापूर येथील वडगाव साठवण तलावाची दुरुस्ती करणार. 125 हेक्टर जमीन सिंचित करणार (जलसंधारण विभाग)
■ शुभमंगल सामूहिक विवाह योजनेत अनुदानामध्ये वाढ, संस्थाना आता 25 हजार रुपये अनुदान. (महिला व बालविकास)
■ मानसेवी वैद्यकीय अध्यापकांचे मानधन वाढविले (वैद्यकीय शिक्षण)
■ आयटीआयमधील कंत्राटी शिल्पनिदेशकांना नियमित शासन सेवेत घेणार (कौशल्य विकास)
■ कृषी वाहिन्यांचे सौर ऊर्जीकरण करण्यासाठी 9020 कोटी एआयआयबी बँकेकडून घेणार (ऊर्जा विभाग)
■ शेतकऱ्यांना दिवसा वीज देण्यासाठी वीज वितरण प्रणालीचे सक्षमीकरण करण्याकरीता 11 हजार 585 कोटींच्या प्रकल्पास मान्यता (ऊर्जा विभाग)
■ पशुसंवर्धन व दुग्धविकास विभागाचे एकत्रीकरण करून पुनर्रचना, प्रशासनात सुधारणा होणार (पशुसंवर्धन व दुग्धविकास)
■ पुणे जिल्ह्यातील वेल्हे तालुक्याचे नाव राजगड करण्यास मान्यता (महसूल विभाग)
■ म्हसळा तालुक्यात शासकीय युनानी महाविद्यालय व रुग्णालय सुरू करणार, युनानी उपचार प्रणालीला प्रोत्साहन (वैद्यकीय शिक्षण विभाग)
■ आशा स्वयंसेविका मानधनात भरीव पाच हजार रुपये वाढ (सार्वजनिक आरोग्य विभाग)
■ मुंबईतील आठ रेल्वे स्थानकांची ब्रिटिशकालीन नावे बदलणार (परिवहन विभाग)
■ मुंबई उपनगरातील वाहतुकीचा मार्ग आणखी मोकळा होणार, उत्तन ते विरार सागरी सेतू मार्गास मान्यता
(नगरविकास विभाग)
■ मुख्यमंत्री ग्रामसडक योजनेत 23 हजार किलोमीटर रस्ते बांधणार, या वर्षात 10 हजार किमी रस्ते
(ग्रामविकास विभाग)
■ भोगवटा मूल्याची रक्कम कमी करणार
■ महाराष्ट्र आणि गोवा वकील परिषदेच्या अकादमीसाठी कळवा येथील शासकीय जमीन (महसूल व वन विभाग)
■ जालना खामगाव नवीन ब्रॉडगेज रेल्वे मार्गासाठी 2453 कोटी रूपये राज्य हिश्यास मान्यता (परिवहन विभाग)
■ दूध व दुग्धजन्य पदार्थांची गुणवत्ता तपासण्याचे अधिकार पशुसंवर्धन आयुक्तांना (पशुसंवर्धन व दुग्धविकास)