उद्धव ठाकरे यांच्या प्रचार रॅलीत फडकले पाकिस्तानचे झेंडे !

जळगाव टुडे । नाशिकच्या पिंपळगाव बसवंत येथे बुधवारी पंतप्रधान नरेंद्र मोदी यांची प्रचारसभा झाली. या सभेत बोलताना देवेंद्र फडणवीस (Devendra Fadnavis) यांनी शिवसेना उद्धव बाळासाहेब ठाकरे पक्षाचे नेते उद्धव ठाकरे यांच्यावर टीकेची झोड उठवली. तसेच उद्धव ठाकरे यांच्या प्रचार रॅलीत पाकिस्तानचे झेंडे फडकल्याचा खळबळजनक आरोप देखील त्यांनी याप्रसंगी केला. ठाकरे हे मतांसाठी फारच लाचार झाले आहेत, असेही फडणवीस आपल्या भाषणात म्हणाले.

आम्हाला वाटले होते उद्धव ठाकरे तरी यांच्यापेक्षा वेगळे असतील. पण मला आश्चर्य वाटते की, परवा त्यांच्या रॅलीमध्येही पाकिस्तानचा झेंडा फडकत होता. काय दुर्दैव आहे पाहा. हिंदु हृदयसम्राट बाळासाहेब ठाकरे यांच्या मुलाच्या रॅलीत मतांच्या लाचारीसाठी पाकिस्तानचा झेंडा फडकत असेल, तर याठिकाणी उपस्थित सर्व देशभक्त मोदींच्या पाठिशी ठामपणे उभे राहून त्यांना आपला पाठिंबा व्यक्त करतील. हे सर्वजण नाशिकमध्ये हेमंत गोडसे व दिंडोरी लोकसभा मतदारसंघात भारती पवार यांच्यामागे उभे राहतील, असेही वक्तव्य देवेंद्र फडणवीस यांनी करून उद्धव ठाकरे यांच्यावर निशाणा साधला.

दरम्यान, देवेंद्र फडणवीस यांनी पंतप्रधान मोदी यांना गंगापुत्राची उपमा दिली. पंतप्रधान नरेंद्र मोदी खऱ्या अर्थाने गंगापुत्र आहेत. त्यामुळेच ते वाराणसीत उमेदवारी अर्ज भरल्यानंतर दुसऱ्याच दिवशी दक्षिणेतील काशी असणाऱ्या नाशिकला आले आहेत, असे ते आपल्या भाषणात म्हणाले.