Crime News : डोळ्यात मिरचीपूड फेकून भरदिवसा चाकू हल्ला करून तलाठ्याची निर्घृण हत्या…!

Crime News : हिंगोली जिल्ह्यात वसमत तालुक्यातील आडगावात एक धक्कादायक घटना समोर आली आहे. शेतीसंबंधीच्या कामासाठी आलेल्या एका व्यक्तीने तलाठ्याच्या डोळ्यात मिरचीपूड फेकून त्यांच्यावर चाकूने हल्ला केला. पोलिसांनी केलेल्या प्राथमिक तपासात असे समोर आले आहे की, आरोपीने आपल्या शेतीच्या फेरफाराचे काम प्रलंबित असल्याच्या रागातून हा हल्ला केला. त्यात तलाठ्याचा मृत्यू झाला आहे.

Crime News : Brutal killing of Talathi by throwing chili powder in his eyes and attacking him with a knife in broad daylight…!

संतोष पवार (वय ३६) असे हत्या झालेल्या तलाठीचे नाव आहे. हल्ल्यात तलाठी पवार हे गंभीर जखमी झाल्यानंतर त्यांना तात्काळ परभणी येथे उपचारासाठी नेण्यात आले. परंतु, दुर्दैवाने, रुग्णालयात पोहोचण्याच्या आधीच त्यांचा वाटेत मृत्यू झाला. या घटनेने संपूर्ण परिसरात खळबळ उडाली आहे आणि सरकारी कर्मचाऱ्यांच्या सुरक्षेच्या बाबतीत गंभीर प्रश्न उपस्थित केले आहेत. पोलिसांनी या प्रकरणाचा तपास सुरू केला असून, या घटनेच्या मागील नेमके कारण शोधण्यासाठी अधिक तपास केला जात आहे.

हल्ला इतका अनपेक्षित, अचानक होता की तलाठी पवार यांना सावरताच आले नाही

वसमत तालुक्यातील आडगाव (रंजे) येथे दुपारी एकच्या सुमारास तलाठी संतोष पवार हे त्यांच्या सज्जा कार्यालयात आपले नियमित काम करत होते. अशात बोरी सांवत गावातील एक व्यक्ती त्यांच्याकडे शेतीच्या प्रलंबित कामासाठी आला. कामासंबंधी दोघांमध्ये काही कारणास्तव बाचाबाची झाली. या वादात आरोपीने अचानक तलाठी पवार यांच्या डोळ्यात मिरचीपूड फेकली आणि त्यानंतर धारदार चाकूने वार केले. हा हल्ला इतका अनपेक्षित आणि अचानक होता की तलाठी पवार यांना सावरता देखील आले नाही. जखमी पवार हे रक्ताच्या थारोळ्यात पडले होते. तलाठी कार्यालयात काय घडले आहे, हे कळताच परिसरातील नागरिकांनी त्वरित धाव घेतली आणि तलाठी पवार यांना उपचारासाठी परभणी येथे हलविण्याचा प्रयत्न केला. मात्र, दुर्दैवाने, गंभीर जखमी झालेल्या पवारांचा रस्त्यातच मृत्यू झाला.