Crime News : जळगाव तालुका पोलिस ठाण्यासमोरच महिलेची १ लाख रूपयांची सोनपोत लांबवली..!

Crime News : जळगाव तालुका पोलिस ठाण्यापासून जवळच शतपावलीसाठी फिरणाऱ्या कल्पना संजय पाटील (वय ५४, रा.खोटेनगर, निमखेडी शिवार, जळगाव) या महिलेल्या गळ्यातील सुमारे १ लाख रुपये किमतीची अडीच तोळ्याची सोनपोत दुचाकीवरून आलेल्या दोघांनी लांबवली. ही खळबळजनक घटना बुधवारी रात्री सव्वा नऊच्या सुमारास घडली. याप्रकणी अज्ञात चोरट्यांच्या विरोधात गुन्हा दाखल झाला आहे.

Crime News : A woman’s dowry of 1 lakh rupees was extended in front of the Jalgaon taluka police station..!

कल्पना पाटील या खोटेनगरात कुटुंबासह वास्तव्याला आहेत. बुधवारी रात्री जेवण झाल्यानंतर त्या शतपावलीसाठी फिरायला निघाल्या होत्या. दरम्यान, तालुका पोलिस ठाण्यासमोर पाण्याच्या टाकीजवळ चालत असताना एका काळ्या रंगाच्या दुचाकीवरून आलेल्या दोघांनी त्यांच्या गळ्यातील सोनपोत तोडली. प्रत्यक्षदर्शींनी दिलेल्या माहितीनुसार, चोरट्यांनी कल्पना पाटील यांच्याजवळ आल्यानंतर दुचाकी हळू केली आणि काही कळायच्या आत कल्पना पाटील यांच्या गळ्यातील सोन्याची पोत तोडून पोबारा केला.

गळ्यातील पोत चोरट्यांनी तोडल्यानंतर कल्पना पाटील यांनी आरडाओरड केली. मात्र, दुचाकीवर आलेले चोरटे अंधाराचा फायदा घेऊन पसार झाले. महिलेने तातडीने जळगाव तालुका पोलिस ठाणे गाठून घडलेली हकीकत सांगितली. पोलिसांनीही लगेच चोरट्यांचा शोध घेत काही ठिकाणचे सीसीटीव्ही तपासले. रात्री उशिरा अज्ञात चोरट्यांविरूध्द गुन्हा दाखल करण्यात आला. पोलिस उपनिरीक्षक नयन पाटील पुढील तपास करीत आहेत.