Chalisgaon News : चाळीसगाव तालुक्यात घोडेगावच्या कार्यकर्त्यांचा भाजपला दे धक्का; शिवसेना ठाकरे गटात प्रवेश !
Chalisgaon News : विधानसभेच्या निवडणुकीची रणधुमाळी सुरू होत नाही तेवढ्यातच चाळीसगाव तालुक्यातील भाजपचे अनेक कार्यकर्ते माजी खासदार उन्मेश पाटील यांच्या नेतृत्वावर विश्वास ठेवून शिवसेना ठाकरे गटात प्रवेश करू लागले आहेत. पक्षाचे कार्यकर्ते एक-एक करून ठाकरे गटाकडे जाऊ लागल्याने अर्थातच भारतीय जनता पार्टीला त्यामुळे मोठा धक्का बसल्याचे बोलले जात आहे.
In Chalisgaon taluka, Ghodegaon workers give a shock to BJP; Shiv Sena Thackeray group entry!
दरम्यान, घोडेगावच्या असंख्य भाजप कार्यकर्त्यांनी शिवसेना ठाकरे गटात प्रवेश केल्यानंतर त्यांचे स्वागत स्वतः माजी खासदार उन्मेश पाटील यांनी केले. गेल्या दहा वर्षात बंजारा समाजाच्या शेवटच्या घटकाची सेवा केली. जय सेवालाल म्हणत तांडा वस्तीच्या भरभराटीसाठी प्रामाणिक काम केले. यापुढे देखील बंजारा समाजातील कार्यकर्त्यांच्या पाठीशी खंबीरपणे उभा राहून त्यांना विकासाच्या मुख्य प्रवाहात आणण्यासाठी माझी धडपड सुरू राहील. घोडेगाव येथील तरुण तडफदार कार्यकर्त्यांनी शिवसेनेत प्रवेश केला. त्यांचे मनापासून स्वागत करतो, अशी भावना माजी खासदार पाटील यांनी व्यक्त केली.
यांची होती पक्ष प्रवेश कार्यक्रमाला उपस्थिती
यावेळी बंजारा समाजातील युवा सामाजिक कार्यकर्ते तथा भटक्या जमाती सेना तालुका प्रमुख अनिल चव्हाण यांनी कार्यकर्त्यांचा परिचय करून दिला. त्यांचा माजी खासदार उन्मेश पाटील, बंजारा नेते मोरसिंगभाई राठोड, उपशहर प्रमुख महेंद्र जैस्वाल यांच्या हस्ते सत्कार करण्यात आला. सामाजिक कार्यकर्ते अंकूश चव्हाण, पंचायत समितीचे सभापती सुनील पाटील, माजी सदस्य रवीभाऊ चौधरी,अमित सुराणा आदी मान्यवर उपस्थित होते. माजी खासदार उन्मेशदादांच्या नेतृत्वाखाली येत्या निवडणुकीत परिवर्तन घडवून आणण्यासाठी आम्ही सज्ज आहोत, अशी भावना युवा कार्यकर्ते रामेश्वर राठोड यांनी व्यक्त केली.
या कार्यकर्त्यांनी केला शिवसेना ठाकरे गटात प्रवेश
भाजपचे कार्यकर्ते रामेश्वर राठोड, विलास राठोड, अमोल गायकवाड, विक्रम जाधव,श्रीनाथ जाधव, वाडीलाल राठोड, रामेश्वर रंगनाथ राठोड, रामेश्वर नामदेव राठोड, रवींद्र गंगाराम जाधव, नितीन चव्हाण, रामेश्वर विजय राठोड, रामेश्वर गब्रू राठोड, रमेश राठोड, रूपचंद जाधव यांच्यासह अन्य कार्यकर्त्यांनी शिवसेना उध्दव बाळासाहेब ठाकरे शिवसेना पक्षामध्ये प्रवेश केला.
