छत्रपती संभाजीनगरात कपड्यांच्या दुकानाला बुधवारी पहाटे भीषण आग, 7 जणांचा मृत्यू

Breaking News | छत्रपती संभाजीनगर शहराच्या छावणी परिसरात असलेल्या दाणा बाजारातील एका कपड्याच्या दुकानाला बुधवारी (ता.03) पहाटे तीन ते चारच्या सुमारास अचानक भीषण आग लागली. त्यात दुकानाच्या वरच्या मजल्यावर झोपलेल्या सात जणांचा होरपळून मृत्यू झाला असून, मृतांत तीन महिला आणि दोन मुलांचा समावेश असल्याचे समजते. दरम्यान, अग्निशमन दलाने आग विझविण्यासाठी शर्थीचे प्रयत्न केले.

छावणी परिसरात महावीर जैन मंदिराच्या शेजारी असलेल्या इमारतीत आगीची घटना घडली. तळघरात कपड्यांच्या दुकानाला अचानक आग लागल्याने वरील मजल्यावर झोपलेल्या सात जणांना खाली उतरून जीव वाचविण्याची कोणतीच संधी मिळाली नाही. सर्वांचा जागीच गुदमरून मृत्यू झाला. आगीची माहिती कळताच अग्निशमन दलाच्या गाड्या तातडीने दाखल झाल्या, पण तोपर्यंत सगळे काही संपलेले होते. आग विझविल्यानंतर होरपळलेले सर्व मृतदेह उत्तरीय तपासणीसाठी घाटीच्या शासकीय रूग्णालयात पाठविण्यात आले.

आगीचे कारण अद्याप समोर आलेले नाही

प्राप्त माहितीनुसार आग लागलेल्या इमारतीत एकूण 16 जण वास्तव्यास होते. त्यापैकी सातजण पहिल्या मजल्यावर तर दुसऱ्या मजल्यावर सातजण होते आणि तिसऱ्या मजल्यावर दोनजण होते. पैकी दुसऱ्या मजल्यावरील सात जणांचा आगीत सापडल्याने मृत्यू झाल्याचे उघडकीस आले आहे. दरम्यान, माहिती मिळताच घटनास्थळी पोलिस तातडीने दाखल झाले. आगीचे कारण अद्याप समोर आलेले नाही, पोलिस त्याचा शोध घेत असल्याचे छत्रपती संभाजीनगरचे पोलिस आयुक्त मनोज लोहिया यांनी माध्यमांशी बोलताना सांगितले.