जळगाव शहरात केंद्रीय मंत्री अमित शहांच्या दौऱ्यानिमित्त भाजपची बाईक रॅली
BJP News : केंद्रीय गृहमंत्री अमित शहा हे मंगळवारी (ता. 05) युवा संवाद कार्यक्रमाच्या निमित्ताने जळगाव जिल्ह्याच्या दौऱ्यावर येत आहेत. त्यांच्या दौऱ्याच्या निमित्ताने भारतीय जनता पार्टीतर्फे सोमवारी जळगाव शहरात भव्य बाईक रॅली काढण्यात आली. राज्याचे ग्रामविकास मंत्री गिरीश महाजन हे स्वतः रॅलीच्या अग्रभागी होते.
केंद्रीय मंत्री अमित शहा यांच्या प्रमुख उपस्थित जळगाव शहरातील सागर पार्क मैदानावर पार पडणाऱ्या युवा संवाद कार्यक्रमाची जय्यत तयारी भाजपातर्फे करण्यात आली आहे. सदरच्या कार्यक्रमाची वातावरण निर्मिती करण्याच्या उद्देशाने जळगाव शहरातील प्रमुख मार्गांवरून बाईक रॅली काढण्यात आली. त्यात स्वतः मंत्री गिरीश महाजन हे बुलेटवर स्वार होऊन सहभागी झाले होते. यावेळी भाजपचे प्रदेश महामंत्री विजय चौधरी तसेच प्रदेश उपाध्यक्षा स्मिता वाघ, महिला आघाडीच्या प्रदेश उपाध्यक्षा डॉ. केतकी पाटील, जळगाव पश्चिम जिल्हाध्यक्ष ज्ञानेश्वर पाटील जळकेकर, जळगाव महानगर जिल्हाध्यक्षा उज्ज्वलाताई बेंडाळे, युवा मोर्चाचे महानगर जिल्हाध्यक्ष महेश पाटील, जळगाव लोकसभा निवडणूक प्रमुख डॉ राधेश्याम चौधरी, जळगावचे खासदार उन्मेश पाटील, जळगाव शहराचे आमदार सुरेश भोळे, चाळीसगावचे आमदार मंगेश चव्हाण आदींसह हजारो कार्यकर्ते सहभागी झाले होते. भाजपच्या वसंत स्मृती कार्यालयापासून प्रारंभ झालेल्या बाईक रॅलीचे सागर पार्कवरील प्रस्तावित कार्यक्रमस्थळी विसर्जन करण्यात आले. दरम्यान, शिस्तबद्ध बाईक रॅलीने शहरवासीयांचे लक्ष वेधून घेतले.
केंद्रीय गृहमंत्री अमित शहा यांचा जळगाव जिल्हा दौरा कार्यक्रम
मंगळवार दि. 5 मार्च, 2024 रोजी दुपारी 3.05 वाजता BSF हेलिकॉप्टर ने जळगाव हेलिपॅड येथे आगमन, दुपारी 3.10 वा. जळगाव हेलिपॅड येथून शासकीय वाहनाने सागर पार्क जिल्हापेठ जळगावकडे प्रयाण, दुपारी 3.20 वा. सागर पार्क जिल्हा पेठ जळगाव येथे आगमन संमेलन कार्यक्रमास उपस्थिती, दुपारी 4.45 वा. सागर पार्क जिल्हा पेठ जळगाव येथून प्रयाण, दुपारी 4.55 वा. जळगाव हेलिपॅड येथे आगमन, दुपारी 5.00 वा. जळगाव हेलिपॅड येथून प्रयाण.
