Bjp Maharashtra : एकनाथ खडसेंच्या भाजप प्रवेशासाठी देवेंद्र फडणवीस एक पाऊल मागे; गिरीश महाजनही फोडणार फटाके…!
Bjp Maharashtra : ज्येष्ठ नेते एकनाथ खडसे यांचा भाजप प्रवेश केंद्रीय नेतृत्वाच्या निर्णयावर अवलंबून असल्याचे आणि त्याबाबतीत दिवाळीनंतर निर्णय होणार असल्याचे उपमुख्यमंत्री देवेंद्र फडणवीस यांनी स्पष्ट केले आहे. खडसेंचे राजकीय प्रतिस्पर्धी मंत्री गिरीश महाजन यांनीही माध्यमांशी बोलताना “एकनाथ खडसेंचा भाजपात प्रवेश झाल्यास, मी फटाके फोडून त्यांचे स्वागत करेन,” असे म्हटले आहे.
Bjp Maharashtra : Devendra Fadnavis one step back for Eknath Khadse’s BJP entry; Girish Mahajan will burst crackers too..!
उपमुख्यमंत्री देवेंद्र फडणवीस यांना शनिवारी सकाळी पत्रकारांशी संवाद साधताना खडसेंच्या भाजप प्रवेशाबाबत विचारले असता, “गणेशोत्सवानंतर योग्य तो निर्णय घेतला जाईल. एकनाथ खडसे काय बोलले हे मी ऐकले नाही. परंतु त्यांच्या भाजप प्रवेशाच्या बाबतीत आमच्या केंद्रीय नेतृत्वाने निर्णय घेतला आहे आणि तो निर्णय सर्वांना मान्य असेल. केंद्रीय नेतृत्वाशी चर्चा करूनच गणेशोत्सवानंतर याविषयी योग्य तो निर्णय घेण्यात येईल,” असे फडणवीस यांनी स्पष्ट केले. यापूर्वी खडसे यांनी लोकसभा निवडणुकीच्या तोंडावर भाजपमध्ये प्रवेश करण्याची घोषणा केली होती, मात्र काही कारणांमुळे त्यांचा पक्षप्रवेश अद्याप झालेला नाही. दरम्यान, खडसेंनी पुन्हा राष्ट्रवादीत परतण्याचे संकेत दिल्यानंतर भाजपच्या हालचाली वाढल्या आहेत.
खडसेंबद्दल नेमके काय म्हणाले मंत्री गिरीश महाजन ?
एकनाथ खडसे यांच्या भाजपमधील संभाव्य पुनर्प्रवेशाच्या चर्चांना राजकीय वर्तुळात उधाण आले असताना, मंत्री गिरीश महाजन यांनीही खडसेंचे जोरदार स्वागत करण्याची तयारी दर्शवली आहे. “एकनाथ खडसे भाजपमध्ये येणार असतील तर आम्ही दिवाळीचे शिल्लक फटाके फोडून त्यांचे स्वागत करू. त्यांच्या प्रवेशाविषयी देवेंद्र फडणवीस काय म्हणाले हे मला माहिती नाही. मात्र, फडणवीस आमचे वरिष्ठ नेते आहेत आणि ते जो निर्णय घेतील तो आम्हाला मान्य असेल,” असे देखील गिरीश महाजन म्हटले.
