अखेर अजितदादा पवार यांना गुण लागला…रोहित पवारांची धक्कादायक माहिती
Jalgaon Today : राष्ट्रवादी काँग्रेसमधून बाहेर पडल्यानंतर भारतीय जनता पार्टीशी हात मिळवणी करणारे अजित पवार (Ajit Pawar) यांच्याबद्दल बोलताना त्यांचे पुतणे रोहित पवार यांनी मोठे वक्तव्य केले आहे. रोहित यांच्या म्हणण्यानुसार अजितदादांना एकदाचा गुण लागला आहे. दादा इतके दिवस कोणालाच काही सांगत नव्हते. योग्यतेच्या माणसांनी विचारले तरच सांगेन, असेही दादा म्हणाले होते. त्याबद्दल पत्रकारांशी बोलताना रोहित पवार यांनी धक्कादायक माहिती दिली आहे.
लोकसभेच्या बारामती मतदारसंघात यावेळी शरद पवारांच्या कुटुंबातच कलगीतुरा रंगला आहे. अजितदादांच्या सौभाग्यवती सुनेत्रा पवार ह्या नणंद सुप्रिया सुळेंच्या विरोधात उभ्या ठाकल्या आहेत. दरम्यान, सुप्रियांना पाठींबा दर्शवून अजितदादांवर निशाणा साधण्यासाठी आता पवार कुटुंबातीलच अनेकजण पुढे येऊ लागले आहेत. त्यात रोहित पवार यांच्या आई आणि वडिलांचा देखील समावेश आहे. दरम्यान, रोहित यांच्या आई सुनंदा पवार यांनी बारामतीमध्ये सध्या काही अनोळखी लोक फिरताना दिसत असल्याचे नुकतेच बोलून दाखवले होते. तसेच मतदानाच्या काही दिवस आधी पैशांचा आणि दडपशाहीचा मोठ्या प्रमाणात वापर होण्याची शक्यता देखील सुनंदा पवार यांनी व्यक्त केली होती. त्याबद्दल पत्रकारांनी अजितदादांनी विचारणा केल्यावर योग्यतेच्या माणसांनी प्रश्न विचारल्यावर उत्तर देईन, असे सांगितले होते. दादांच्या त्या वक्तव्याचा समाचार रोहित पवार यांनी आता ट्वीटद्वारे घेतला आहे.
रोहित पवार ट्वीटरवर म्हणाले आहेत, की “बरोबर आहे दादा तुमचं. स्वतःच्या अंगावर आले की ते भलतीकडे ढकलण्याचा भाजपाचा संगतगुण तुम्हाला लागला आहे. आजवर तुमचा प्रचार केला तेव्हा आम्ही योग्यतेचे होतो, पण आज नाही. मिर्चीवाले तसेच महाराष्ट्र सदनवाले, सिंचनवाले, एकाच वेळी दोन घरे सांभाळणारे, आदिवासी विद्यार्थ्यांच्या दुधातली मलई खाणारे, मागासवर्गीय विद्यार्थ्यांचे जेवणाचे ताट पळवणारे… हे मात्र तुमच्या लेखी योग्यतेचे आहेत”.
