दोन कारची समोरासमोर धडक; सात जण जागीच ठार, पाच जण गंभीर जखमी !

जळगाव टुडे । राँग साईडने येणाऱ्या भरधाव कारने दुसऱ्या एका कारला वेगाने धडक दिल्याने सात जणांचा जागीच मृत्यू झाला आहे, तर अन्य पाच जण गंभीर जखमी झाले आहेत. जखमींना उपचारासाठी रूग्णालयात हलविण्यात आले असून, मृतांची ओळख अद्याप पटलेली नाही. हा भीषण अपघात समृद्धी महामार्गावर जालन्यातील कडवंची गावाजवळ दोन कार समोरासमोर धडकल्याने झाल्याची माहिती मिळाली आहे. अपघातात दोन्ही गाड्या चक्काचूर झाल्याचे सांगितले जात आहे. ( Accident News )

आजुबाजुच्या गावातील ग्रामस्थांनी दिलेल्या माहितीनुसार, अपघातातील एर्टिगा गाडी ही नागपूरवरुन मुंबईच्या दिशेने जात होती. याच वेळी एक स्विफ्ट डिझायर गाडी पंपावर डिझेल भरुन राँग साईडने भरधाव वेगाने येत होती. दोन्ही कार समोरासमोर आल्यानंतर हा भीषण अपघात घडला. घडलेला अपघात एवढा भीषण होता की, एर्टिगा गाडी महामार्गाचे बॅरिकेट्स तोडून रस्त्याच्या बाजुला चार ते पाच फूट खाली जाऊन कोसळली.

दरम्यान, रात्रीच्या वेळी सदरचा अपघात घडल्यामुळे मृतदेहांची अंधारात ओळख पटविण्यात पोलिसांना यश आले नाही. घटनेची माहिती मिळताच पोलिस आणि इतर मदतकार्य पथक घटनास्थळी पोहचण्यास देखील उशीर झाल्याचे स्थानिक ग्रामस्थांकडून सांगण्यात आले. पोलिस या प्रकरणात अधिक तपास करत असून, अपघाताचे कारण शोधले जात आहे. गंभीर जखमींवर रूग्णालयात उपचार सुरू असून, मृतांचा आकडा आणखी वाढण्याची शक्यता सूत्रांकडून व्यक्त करण्यात आली आहे.