अज्ञात वाहनाची बोलेरो कारला धडक; पोलिस कॉन्स्टेबलसह आठ जणांचा जागीच मृत्यू

जळगाव टुडे । मध्य प्रदेशातील इंदौर-अहमदाबाद राष्ट्रीय महामार्गावर बुधवारी रात्री उशिरा भीषण अपघात झाला असून, एका अज्ञात वाहनाने बोलेरो कारला जोरदार धडक दिल्याने पोलिस कॉन्स्टेबलसह आठ जणांचा जागीच मृत्यू झाल्याचे उघडकीस आले आहे. भीषण अपघातानंतर अज्ञात वाहनचालक घटनास्थळावरून फरार झाला आहे. मृतांची ओळख अद्याप पटलेली नाही. (Accident News)

पोलिसांनी दिलेल्या माहितीनुसार, बोलेरो कारच्या अपघातात मृत्युमुखी पडलेले सर्व प्रवासी गुना जिल्ह्यातील रहिवासी आहेत. बुधवारी (ता.15) रात्री उशिरा ते सर्वजण बोलेरो कारने अलीराजपूरच्या बोरी गावात एका खासगी कार्यक्रमासाठी गेलेले होते. कार्यक्रम आटोपून परत येत असतानाच त्यांच्या कारला अज्ञात वाहनाने जोरदार धडक दिली. अपघाताची माहिती मिळताच पोलिस घटनास्थळी तातडीने दाखल झाले. रुग्णवाहिकेतून सर्व आठ मृतदेह बेटमा रुग्णालयात आणण्यात आले. मृतांची नावे अद्याप समोर आलेली नसून पोलिसांकडून ओळख पटवणे सुरू आहे. अपघातात एकजण सुदैवाने बचावला असून, तो गंभीर जखमी झालेला आहे. त्याच्यावर रूग्णालयात पुढील उपचार सुरू आहेत.