अजित पवारांना मोठा धक्का….तब्बल ३९ पदाधिकारी शरदचंद्र पवार राष्ट्रवादीत करणार प्रवेश !

जळगाव टुडे । लोकसभेच्या निवडणुकीत दारूण पराभवाला सामोरे जावे लागल्यानंतर अजित पवार राष्ट्रवादी काँग्रेसचे अनेक आमदार शरद पवारांच्या राष्ट्रवादीत प्रवेश करण्याच्या तयारीत असल्याची बातमी आधीच वाऱ्यासारखे पसरली आहे. तशात आता अजित पवार गटाचे तब्बल ३९ पदाधिकारी शरदचंद्र पवार राष्ट्रवादीत प्रवेश करणार असल्याचे खात्रीलायक वृत्त येऊन धडकले आहे. हा वैयक्तिक अजित पवारांना खूप मोठा धक्का मानला जात आहे. ( Ncp Ajit Pawar )

Ncp Ajit Pawar
लोकसभेनंतर लगेचच विधानसभा निवडणुकीचे पडघम वाजू लागल्याने राज्यातील महायुती तसेच महाविकास आघाडी आता ॲक्शन मोडवर आलेली आहे. अजित पवार आणि शरदचंद्र पवारांच्या राष्ट्रवादीतही दोन्ही बाजुला मोठी राजकीय उलाथापालथ होताना दिसत आहे. लोकसभेच्या निवडणुकीत झालेली पक्षाची बिकट अवस्था लक्षात घेता विशेषतः अजित पवारांच्या राष्ट्रवादीचे अनेक आमदार हे आता शरद पवारांच्या संपर्कात असल्याचे सांगितले जात आहे. खुद्द शरद पवारांनी त्यांना घरवापसी करण्यास संमती दिली आहे. त्यामुळे अजित पवारांना त्यांच्यासोबत मूळ राष्ट्रवादी सोडून आलेल्या सर्व आमदारांचे मनोधैर्य कायम राखताना मोठी तारेवरची कसरत करावी लागत आहे.

दरम्यान, विधानसभेच्या निवडणुकीआधीच अजित पवार राष्ट्रवादी काँग्रेस पक्षाला मोठे खिंडार पडल्याचे बोलले जात आहे. कारण, अजित पवारांचा दबदबा असलेल्या पिंपरी-चिंचवड शहरातले सुमारे ३९ पदाधिकारी लवकरच शरदचंद्र पवार राष्ट्रवादी काँग्रेस पक्षात प्रवेश करणार असल्याचे खात्रीलायक वृत्त आहे. येत्या २० जुलै रोजी त्या ३९ पदाधिकाऱ्यांचा पक्ष प्रवेश होणार असून, विधानसभेच्या आगामी निवडणुकीच्या पार्श्वभूमीवर अजित पवार गटाला तो मोठा धक्का मानला जात आहे.